Sec. VII.

[Commentarius]

Fergeolus, Episcopus Gratianopolitanus Martyr (S.)

[1] Gratianopolitanæ Ecclesiæ tertiusdecimus Antistes recensetur a Ioanne Chenu S. Fergeolus, quem Martyrem credimus, inquit. Consentit Claudius Robertus. At Saussaius: Gratianopoli natalis S. Fergeoli Episcopi & Martyris, qui post Clarum ea in Cathedra sedens, cum boni pastoris munia expleret, iustitiamque & Ecclesiasticam libertatem animo vere Pontificio tueretur, Sede deturbatus ab Ebroino tyranno, cum aliis plurimis sanctissimis Præsulibus, [S. Fergeolus sub Ebroino passus.] qui eius nefandis molitionibus, ex Dei zelo, & proximi amore renitebantur; primum in exilium pulsus, deinde etiam dura nece iugulatus est: sicque laminæ Pontificali adiuncta martyrij pro iustitia initi laurea, ad æternos triumphos euolauit.