[Commentarius]

Felix, Martyr Heracleae (S.)
Ianuarius, Martyr Heracleae (S.)

Martyrologivm Romanum: In ciuitate Heraclea, sanctorum Martyrum Felicis & Ianuarij. Consentit Vsuardus, Bellinus, Maurolycus, Galesinius, MS. Florarium, Martyrol. German. MSS. complura, & nominatim antiquißima duo S. Hieronymi. Nihil de his certi possum pronuntiare, nisi non assentiri me Biuario, qui commentariis in Dextri Chronicon ad annum CCXCVI. num. 4. hos esse censet, quos Græci referunt XVI. Aprilis cum Fortunato & Septimio; passosq; vult Heracleæ ciuitate Hispaniæ. Nam qui isthic celebrantur a Græcis, ij XXIV. Octobris coluntur Venusiæ in Apulia, licet de martyrij loco haud satis constet. Non tamen videntur Heracleæ ad fretum Gaditanum interfecti, nec est in Actis quidquam, vnde id coniici poßit. An Heracleæ, quæ Lucaniæ vrbs fuit, culti aliquando Felix Episcopus & Ianuarius Presbyter, eo forte translati, haud dixero. Probabilius est, alios ab his esse, in alia quapiam Heraclea passos. De Hispanica Heraclea assentiemur Biuario, cum certum attulerit argumentum. MS. Martyrologium S. Hieronymi iterum (de iisdem, vt ego quidem arbitror) XIV. Februarij: In Heracla natalis Felicis, Ianuari.