[Commentarius]

Rusticianus, Episcopus Brixiensis (S.)

Galesinivs V.Ianuarij: Brixiæ S. Rusticiani Episcopi. Is B. Honorio eiusdem vrbis Episcopo cum successerit, [S. Rusticiani memoria in martyrol.] pietatis Christianæ officiis populum Brixiensem religione instruxit: omnique Episcopali virtute & sanctitate florentissimus, quieuit in Domino. Ferrarius in generali Sanctorū: Brixiæ S. Rusticiani Episcopi. Fusius in Catalogo Sanctorum Italiæ. Rusticianus Episcopus Brixiensis, vigesimo primo loco Ecclesiam Brixiensem administrauit: [Succedit S. Honorio.] post S. Honoriū ad munus Episcopale euocatus. Hic omni Episcopali virtute & sanctitate florens, populum Brixiensem non tam verbo quam vitæ probitate & exemplo erudiuit, ac post aliquot annos sancto fine quieuit in Domino: illique S. Dominator suffectus est. [Corpus in ecclesia S. Zenonis.] Corpus in ecclesia S. Zenonis Parochiali conditum requiescit. Cætera ignorantur, ita vt neque patria ipsius, neque tempus, quo Ecclesiæ Brixiensi præfuerit, sciri potuerint. Hæc ibi: in generali Catalogo tradit sub Constantio Ariano pro fide exulasse.

Meminit quoque Rusticiani Ascanius Martinengus discurs. I. de Nobilitate Ecclesiæ Brixiensis. Sed. cum S. Philastrius & S. Gaudentius S. Ambrosij ætate vixerint, qui potuit Rusticianus longe iis iunior, a Constantio Augusto proscribi? De S. Philastrio agemus XVIII. Iulij, de S. Gaudentio XXV. Octobris, de S. Honorio XXIV. Aprilis, de S. Zenone XII. Aprilis.