[Commentarius]

Athanasius, Martyr (S.)

Ex variis.

Plvres memorantur in sacris Fastis Athanasij Martyres. Hunc Græcorum referunt Menæa virgis exanimatum; eoq; laudant disticho:
Virgis Athanasi teipsum offers,
Festinans quidem mori, viuere vero meliori bono.

Alludit ad Athanasij nomen, quod immortalem significat. Nullus ex ceteris Athanasiis Martyribus hoc necatus supplicio legitur. III. Ianuar. S. Athanasius Commentariensis cum Zosimo, [Plures Athanasij Martyres.] post fidei confeßionē, tolerataq; tormenta, in specu obdormiuit. XXIII. April. S. Athanasius, antea magus, sed a S. Georgio conuersus, gladio cæsus. XXIII. Ian. S. Athanasius Lector, quo interemptus supplicio sit non proditur, sed iunguntur illi necis socij Aristocles Presbyter, & Demetrius Diaconus. V. Iulij S. Athanasius Diaconus Hierosolymis flagris quidem concisus est, sed ad extremum ferro necatus. XXIII. Augusti S. Athanasius Episcopus ense percussus est Tarsi. Ex quibus concludimus nullum eorum eße Athanasium quem hoc die Græci venerantur.