[Commentarius]

Theophilus, Diaconus Martyr Afri (S.)
Helladius, Martyr Afri (S.)

De his VIII. Ianuarij Martyrologium Romanum: In Libya Sanctorum Martyrum Theophili Diaconi & Helladij, qui primo laniati ac testulis peracutis compuncti, demum in ignem coniecti animas Deo reddiderunt. Eadem fere habet Menologium Græcorum, addens sub Proconsule hæc passos. [Horū SS. patria, & tormenta.] Paullo fusius Menæa: Eodem die sancti Martyres Theophilus diaconus, & Eladius laicus passi sunt. Hi Libyes erant. Ob Christi vero confessionem comprehensi, & ad Proconsulem deducti, cum in fide perseuerarent, atrociter verberati sunt. Vinctæ dein manus ac pedes, tergumque ferro atque igne adustum: tum acutis compuncti testis; cum identidem tormenta plura ingererentur, animas Deo tradiderunt. Galesinius: In Græcia, beatorum Martyrum Theophili diaconi, & Helladij. Hi, in Libya nati, Christianæ fidei cultores, idolorum cultum cum passim exagitarent, Proconsulis iussu virgis acerbe cæsi, tum vngulis ferreis excarnificati, post in lumbis semiustulati, deinde testularum aculeis confossi, nihil vnquam de constantia sua remiserunt. Itaque demum horribilem in modum raptati, confractis totius corporis ossibus, animas Deo reddiderunt.